El Corte Inglés xa prepara o seu desembarco en Benito Corbal: chega Sfera
Por Redacción
El Corte Inglés prepara un novo desembarco en Pontevedra, neste caso, na 'milla de ouro' comercial, a rúa Benito Corbal. Tras a apertura de Supercor entre as rúas Antón Fraguas e Loureiro Crespo fai xa máis de seis anos, nos próximos meses abrirá as portas dunha tenda de roupa e complementos Sfera.
Fontes municipais confirmaron a PontevedraViva que a empresa xa se interesou pola apertura dunha tenda en dous baixos en aluguer na rúa Benito Corbal, os situados entre o local da marca de roupa interior Women's Secret e o do solario Icaria, que levan varios anos baleiros e co cartel de 'Alúgase' colgado.
Ata o momento non se formalizou a licenza municipal de apertura, pero cabe recordar que coa nova lexislación relativa ás licenzas express o trámite practicamente non ten demora nada máis que unhas semanas dende o momento en que se solicta e, ademais, poden abrir sen ela sempre que o papelame xa se iniciase.
Se ben a empresa non facilitou datos concretos nin ningún detalle da operación, outras fontes coñecedoras da operación indicaron que El Corte Inglés xa estaría a pagar polo aluguer de ambos os dous locais na actualidade, de modo que se prevé que a apertura se produza a curto-medio prazo. Antes é necesario que realicen reformas nos locais, que actualmente están completamente baleiros.
A cadea de moda Sfera ofrece roupa infantil, de muller e de home apostando pola calidade de El Corte Inglés, pero con renovación constante e variedade nas súas coleccións. Con comercios xa en Vigo, oferta pezas e complementos a prezos accesibles seguindo as últimas tendencias da moda urbana. Dende a súa apertura no ano 2002 con vocación de unirse á gran distribución de moda de marcas como as do Grupo Inditex, xa se expandiu internacionalmente.