Estragan un valado nas proximidades do lugar de celebración da Festa do Pelete
Por Redacción
O Concello da Lama terá que reparar os estragos ocasionados na estacada que circunda o parque infantil que apareceu destruída nun lateral e na porta de acceso na zona da área recreativa xunto ao carballo centenario do Pelete.
O alcalde do municipio, Jorge Canda, en compañía do tenente de alcalde José Fortes inspeccionaron os traballos que están a levar a cabo os operarios municipais para facilitar o acceso ás zonas habilitadas como aparcadoiro público nas inmediacións onde terá lugar a tradicional Festa do Pelete.
Canda inspeccionou, en compañía do tenente de alcalde José Fortes, os accesos aos aparcadoiros e puido comprobar os estragos que, segundo entenden as fontes municipais, terían a súa orixe en xinetes que deixaron provisionalmente os seus cabalos atados ao valo. O Concello ten previsto proceder a reparar de forma inmediata.
O alcalde criticou o xeito de proceder destas persoas que "non se dan conta de que coa súa acción non só están a producir un dano senón que repercute moi negativamente en toda a cidadanía xa que cando o Concello ten que reparar ou repoñer algún elemento do mobiliario público sofre o erario municipal, xa que se paga con diñeiro de todos".
A Festa do Viño do Pelete desenvólvese do 7 ao 9 de setembro e a súa celebración será en honor á Virxe dos Remedios.