O Concello de Poio pecha agosto cos mellores resultados turísticos dos últimos cinco anos
Por Redacción
O municipio de Poio ven de pechar o mes de agosto cos mellores resultados de ocupación hoteleira dos últimos cinco anos. Segundo os datos que facilita a Concellaría de Turismo, o pasado mes pechou cunha ocupación media do 89%, sendo do 83% a ocupación real ao longo da segunda quincena de agosto.
A singularidade de Combarro é o principal atractivo que atrae aos turistas ata Poio, seguido da gastronomía, o Mosteiro de San Xoán e a ubicación xeográfica do municipio, que permite visitar outros emprazamentos de interese das Rías Baixas.
Ata 7.214 persoas se achegaron ás oficinas de turismo municipais na segunda metade do pasado mes. Desta cifra, un 92% corresponde o turismo nacional, e a porcentaxe restante son estranxeiros. Madrid cun 22,56%, Andalucía cun 12, 44%, Cataluña cun 11,36%, e País Vasco cun 11,23%, son as Comunidades Autónomas con maior número de visitantes. No que atinxe os visitantes do exterior, Francia, Reino Unido e Portugal acumulan o maior número de persoas.
O perfil do turista que elixe Poio segue a ser o familiar, que supón máis do 42% do total. Para un 75% destas persoas foi a primeira vez que visitaban o concello, e nunha porcentaxe similar o medio de transporte foi o vehículo particular. A estancia máis frecuente corresponde ós que pasaron entre cinco e sete días en Poio, mentres que preto do 22% estivo máis dunha semana.
Dende a apertura das oficinas de turismo municipais ata o peche de agosto estas recibiron 14.695 visitas.