Dous feridos ao chocar dous coches en Cambados
Por Redacción
Creada e actualizada
Creada e actualizada
Dúas persoas de 18 e 50 anos resultaron feridas na noite deste domingo nun aparatoso accidente de tráfico rexistrado en Cambados no que se viron implicados dous vehículos, un turismo e un todoterreo.
Segundo fontes de emerxencias, o sinistro produciuse sobre as 23.50 horas na estrada que comunica A Modia co polígono industrial de Cambados, na zona de Vilariño e Oubiña.
Nun primeiro momento informouse aos servizos de emerxencia da existencia de catro feridos, pero tan só dous tiveron que ser trasladados ao hospital. Os dous feridos resultaron ser os condutores de ambos os dous vehículos, ambos os dous veciños de Cambados. A muller de 50 anos R.M.A.R. foi trasladada ao Hospital do Salnés por unha ambulancia do 061 e o mozo de 18 anos R.V.F. tivo que ser evacuado en ambulancia ao Hospital Domínguez.
Os feridos non estaban atrapados, pero, de todas maneiras, si que foi necesaria a intervención dos Bombeiros do Salnés, pois aínda que non houbo que excarceralos, si que tiveron que extraer os dous feridos do interior dos turismos. No caso da condutora do todoterreo, cortaron o asento traseiro para evacuala polo portón traseiro.
Ao lugar do sinistro trasladáronse, mobilizados polo Centro de Atención de Emerxencia de Galicia 112, efectivos de Protección Civil de Cambados, os Bombeiros do Salnés, Urxencias Médicas 061 e a Garda Civil.