Avances para garantir o abastecemento de auga a 1.500 veciños da Lama
Por Redacción
A construción do novo sistema de abastecimento de auga da Lama, Antas e o polígono industrial de Racelo avanza a bo ritmo. Trátase da maior obra hidráulica na historia do municipio, conta cun presuposto superior aos 1,3 millóns de euros e beneficiará a máis de 1.500 veciños.
O alcalde da Lama, Jorge Canda Martínez, visitou este sábado os traballos que se están a realizar financiados pola Xunta de Galicia a través de Augas de Galicia para mellorar a situación actual na zona. Na actualidade, o sistema de abastecemento presenta un funcionamento diferente en función da época do ano, xa que en inverno a rede se alimenta a través de mananciais que surten tres depósitos situados no Monte do Ceo e en verán os mananciais e pozos secan, de modo que a parroquia da Lama se abastece dos excedentes do bombeo do río Verdugo.
O proxecto inclúe unha nova captación mediante dous pozos filtrantes e unha estación de tratamento de auga potable (ETAP) ao pé do río Verdugo deseñada para un caudal de 14 litros por segundo, segundo informou o Concello.
O novo depósito de cabeceira comunícase cos tanques existentes da Lama a través dunha nova condución de fundición duns 1.150 metros de lonxitude; co depósito do polígono industrial de Racelo, mediante unha canalización de fundición duns 2.425 metros de lonxitude; e co tanque que abastece a parroquia de Antas, mediante un ramal que parte da condución que une o depósito de cabeceira co do polígono, cunha lonxitude duns 300 metros.