Ponte Caldelas soa a Rock&Rocke
Por Redacción
O festival Rock&Rocke viviu durante a noite do venres ao sábado a súa segunda edición colleitando un novo éxito e poñéndose, segundo o Concello de Ponte Caldelas, no camiño da súa continuidade como cita musical obrigada para os mozos do municipio e doutros concellos da comarca.
Os organizadores do evento, Festeiros 2.0, misturaron diversos grupos e gustos musicais coa intención de abrir ao máximo a oferta desta edición que congregou en Chan da Barcia a centos de mozos. Ademais, un artista do graffiti realizou varios cadros en directo, diante do público, mentras se representaban sobre o escenario temas de rap e de hip-hop.
Elka+Familia ofreceu un amplio repertorio composto por temas hip-hop, mentras que Proxecto Ícaro centrou a súa actuación en temas pop-rock. Os vilagarciáns The Seangles ofreceron versións rock de todos os tempos e o Dj local Alvaro Malvar foi o encargado de poñer a música máis actual.
A amplitude de estilos permitiu ver no Chan da Barcia a persoas de todas as idades, ademais de representantes políticos como o alcalde, Andrés Díaz; o tenente de alcalde de AVP, Alfonso Gutiérrez; o tenente de alcalde do BNG, Lito Muíños; e varios membros do equipo de goberno do Concello de Ponte Caldelas.
Ademais, na noite do venres volveuse celebrar en Ponte Caldelas o 'Caldelas Tapas', que chegou á súa terceira xornada con grupos de persoas ou clientes a título individual que percorreron os 9 establecementos participantes nesta primeira edición deste concurso gastronómico.