Perfecto Rodríguez reivindica a súa última obra tras deixar a Alcaldía de Ponte Caldelas
Por Redacción
Dous meses despois de deixar a Alcaldía de Ponte Caldelas, o ex alcalde Perfecto Rodríguez saltou á palestra da actualidade este sábado para reivindicar unha última obra da súa etapa como rexedor. É a última actuación que adxudicou antes de deixar o despacho e supón completar a renovación de todas as instalacións deportivas do centro do municipio.
Perfecto Rodríguez reivindica o inicio das obras de construción da pista de padel no terreo existente entre o pavillón de deportes e a pista de tenis ao aire libre do complexo deportivo de Chan da Barcia. Conta cun presuposto de 49.000 euros, dos que 33.054 euros son subvencionados pola Xunta mediante unha subvención que o PP defende que xestionou no seu día o ex alcalde.
Ademais nesta obra, considérase tamén o acondicionamento do resto do terreo con formigón, que mellorará a imaxe de toda a zona. É unha das melloras ofertadas pola empresa adxudicataria.