Bordóns volve á súa esencia labrega
Por Redacción
A parroquia de Bordóns volverá este sábado 22 de agosto á súa esencia máis tradicional coa celebración da sexta edición do seu Festa Labrega, que este ano dará unha maior relevancia á cata de viños de viticultor, unha actividade que xa viñan realizando pero que este ano abren a toda a bisbarra.
Os concelleiros de Cultura e Turismo de Sanxenxo, Roberto Carlos Agís e Jesús Sueiro, acompañaron este xoves á comisión organizadora da festa nunha presentación oficial na que o presidente da organización, Esteban Miniño, explicou que queren dar a coñecer a gran variedade de caldos que se cultiva en Sanxenxo e o resto da comarca e que, a pesar de carecer de etiqueta, ofrecen unha gran calidade.
Na Festa Labrega participan habitualmente ao redor dunha vintena de viticultores, pero este ano confían en alcanzar a trintena de participantes, que competirán por un dos tres premios que hai en xogo. A cata terá lugar ás 13.00 horas, pero non será ata a media noite cando se entreguen os premios.
A partir das 12.00 horas, abrirán os postos da Feira de Artesanía e produtos da terra, que permanecerán abertos ata a noite. A xornada estará amenizada con diferentes actividades, como unha tarde con xogos tradicionais e os campionatos de billarda e de chave. Ademais, pola tarde organizarase un concurso no que os tomates, as cebolas, os pementos e as patacas competirán por conseguir a distinción de ser o máis grande de Bordóns.
Pola tarde, sobre as 20.00 horas terá lugar o 'Serán Festa Labrega', que contará coas actuacións das agrupacións Retesías e Penaguda. Posteriormente haberá unha churrascada con prezos populares a continuación de á cal os organizadores ofrecerán queimada gratuíta para todos os asistentes.