Cortan a N-550 en Cerponzóns pola colisión entre tres camións
Por Redacción
Tres camións protagonizaron un aparatoso accidente este luns na estrada N-550 ao seu paso pola parroquia de Cerponzóns, en Pontevedra. Por motivos que se descoñecen, os tres colidiron entre si e provocaron que se tivera que cortar un carril da citada estrada á altura do restaurante Casa Florita.
Pese aos danos materiais, os condutores dos tres camións implicados resultaron ilesos. Si se produciron incidencias na circulación, pois a causa do accidente, o tráfico quedou interrompido no carril en sentido Coruña, segundo indicaron os axentes da Garda Civil de Tráfico e informa o Centro de Atención de Emerxencias de Galicia 112. A circulación volveu á normalidade a media mañá.
O 112 tivo coñecemento da colisión múltiple sobre as 9.00 horas deste luns a través da chamada dun particular. A partir de aí, os xestores do centro pasaron aviso ás forzas da orde e ós servizos de limpeza e mantemento do Ministerio de Fomento.