Sanxenxo inicia a licitación das obras de derrubamento dos chalés de Dorrón
Por Redacción
Os chalés construídos xunto ao cemiterio de Dorrón, en Sanxenxo, e que non chegaron nunca a rematarse teñen, esta vez si, as horas contadas.
O Concello anunciou o inicio do proceso de licitación das obras para o derrubamento destas catro vivendas, ás que en 2008 se lle anulou a licenza por incumprir os 50 metros de separación obrigada entre a urbanización e o cemiterio.
O goberno catripartito quere cumprir así coas esixencias do Xulgado do Contencioso Administrativo, que en xuño de 2014 ratificou a súa sentenza inicial que instaba ao derrubamento de xeito inmediato e recoñecía a administración local como responsable de asumir as obras.
Agora o Concello encabezado por Gonzalo Pita, que ve nestes casos "a primeira consecuencia dunha herdanza urbanística que impide ao cuatripartito iniciar de forma inmediata unha forma diferente de traballar", iniciou o proceso de licitación baseándose nun proxecto técnico de demolición que fixa en 55.000 euros o custo das obras.
Ademais habilitouse unha partida de 2.117,50 euros para asumir o custo de dirección de obra facultativa do proxecto de demolición.
"Este expediente corresponde a unha época lamentable que queremos deixar atrás pero, por desgracia para os veciños de Sanxenxo, continúa xerando un quebranto económico para as arcas municipaless", apuntaron dende o grupo de goberno.