Que pasa coa concelleira María Rey e o seu partido Ciudadanos?
Por Oskar Viéitez
Nun comunicado emitido dende Barcelona este mércores 12 de agosto, o secretario de Organización de Ciudadanos (C's), Fran Hervías, informa que "María Rey segue sendo concelleira e membro da xunta directiva de Ciudadanos Pontevedra".
Esta nota de prensa oficial é unha resposta á decisión tomada o pasado venres, 7 de agosto pola xunta executiva da agrupación de Pontevedra de Ciudadanos na que se acordou o cesamento da súa coordinadora, a concelleira María Rey Martínez. Nomeando de xeito provisional para tal función a Ricardo Alfonso Rodríguez Bogo, número 3 da candidatura.
Segundo aclara o secretario de Organización de Ciudadanos "seguindo os estatutos e regulamentos de Ciudadanos, tres membros dos cinco que compoñen a xunta directiva destituíron a María Rey como coordinadora de C's en Pontevedra facendo forza coa súa maioría absoluta dentro do órgano territorial".
A xunta directiva de Ciudadanos Pontevedra denuncia un pacto encuberto da súa concelleira co goberno local do BNG
Este grupo de afiliados críticos coa xestión de María Rey trasladou ao comité de garantías de Ciudadanos un escrito no que denuncian un pacto encuberto da súa concelleira co goberno local do BNG, unha formación á que definen como "de corte nacionalista-separatista".
Finalmente sinalan a posibilidade de formular unha moción de censura para expulsar a María Rey da xunta executiva, e mostran a conveniencia de que María Rey entregue a súa acta de concelleira.
Respecto a este escrito Fran Hervías puntualizou que "se analizou a actividade política do grupo municipal de C's Pontevedra" e que non houbo "ningunha votación nin actuación que contradiga as claves e principios do partido" polo que, explicou, "María Rey, segue sendo cargo electo e membro da Xunta Directiva".
Ademais Hervías engadiu que ao longo do mes de setembro "se reorganizará a estrutura de Ciudadanos en Galicia" e explicou que está previsto que "as agrupacións provinciais desaparezan creándose agrupacións locais".
"Esta reestruturación está dentro da reorganización do partido a nivel nacional", concluíu o secretario de Organización de C's.