O Concello de Vilagarcía introducirá cláusulas sociais na contratación de servizos
Por Redacción
O goberno local de Vilagarcía introducirá cláusulas sociais nos pregos para a contratación de servizos municipais. Con esta media, recollida no programa electoral de Alberto Varela, os socialistas pretenden influír na mellora das condicións laborais dos traballadores das empresas privadas que traballen para a administración local, así como favorecer a integración laboral de colectivos desfavorecidos.
O goberno local utilizará esta ferramenta como medio para garantir a inserción socio laboral de persoas en situación ou risco de exclusión, primando ás empresas que opten pola contratación de traballadores nestas circunstancias. Do mesmo xeito, tamén se valorará a contratación de persoas con discapacidade, sempre que estas non sexan incompatibles coas funcións a desempeñar.
Outros criterios a abordar nas cláusulas sociais será o peso dos contratos indefinidos no total da empresa fronte aos temporais, así como as facilidades de conciliación.
A concelleira de Servizos Sociais, Tania García, e o edil de Educación Argimiro Serén, xa se puxeron a traballar nesta innovadora proposta que pretenden aplicar xa na adxudicación de dous dos servizos máis importantes que ten externalizados o Concello e que se licitarán nos próximos meses. Son o servizo de Axuda no Fogar e o servizo de limpeza de edificios municipais.