Estudarán medidas para mellorar a seguridade viaria nas estradas de Marín a Rande e Moaña
Por Redacción
A Axencia Galega de Infraestruturas está a analizar a posibilidade de executar actuacións de seguridade viaria e sendas peonís nas estradas de Marín-Rande (PO-551) e Marín-Moaña (PO-313). Entrarían dentro do programa de actuacións de mellora da mobilidade e a seguridade vial.
Esta intención da Administración autonómica foi un dos puntos que abordaron este venres a conselleira de Medio Ambiente, Territorio e Infraestruturas, Ethel Vázquez, e a alcaldesa de Marín, María Ramallo, nunha reunión de traballo en Marín.
Con estas obras, axeitadas ao tráfico e requirimentos da estrada, compatibilizarase a mellora do tránsito en condicións cómodas e seguras cunha mínima afección para os veciños e veciñas da zona, segundo avanzou a conselleira.
Ethel Vázquez tamén avanzou que este mes de agosto comezarán as obras da rede de sumidoiros nos lugares de Pereiro e Cadrelo (parroquia de Santo Tomé de Piñeiro), no Concello de Marín. Salientou o esforzo da Xunta en materia de saneamento, pois a actuación conta cun investimento de arredor de 540.000 euros, que se suma aos investimentos da obra de saneamento de Pereiro- O Pozo, que facilitará a posta en servizo da infraestrutura xa rematada de Miñán-A Esperela.
As previsións de Augas de Galicia son que esta actuación se remate este mesmo verán. Ambas actuacións suman un investimento dun millón de euros para este ano. Ademais, Vázquez lembrou que Augas de Galicia segue a traballar a prol do saneamento da ría de Pontevedra, e que se continúa coa realización de diagnósticos e análises da situación das redes de saneamento, así como na planificación de actuacións de mellora que eviten verteduras sen depurar á ría.