A Ruta do Viño Rías Baixas inicia o martes o seu programa de visitas cos Buses do viño
Por Oskar Viéitez
A Ruta do Viño Rías Baixas dará o martes o pistoletazo de saída a unha das súas actividades estrela do verán. Os buses do viño levarán os visitantes a un total de 18 adegas (tres por itinerario), que están integradas dentro desta asociación sen ánimo de lucro. Os percorridos desenvolveranse os martes 11, 18 e 25 e os mércores 12, 19 e 26 de agosto.
Os puntos de inicio da xornada entre viñedos serán Sanxenxo (dende onde os buses sairán todos os martes), Baiona (o mércores 12) e Pontevedra e Vigo (os días 19 e 26 o autobús parará en ambas as dúas cidades).
Unha guía turístico acompañará aos participantes na súa viaxe e ofreceralles durante o camiño detalles sobre as características da Denominación de Orixe Rías Baixas, así como das distintas subzonas que a integran. Tamén conducirá os asistentes nas visitas guiadas a vilas emblemáticas da Ruta do Viño.
Xa nas propias adegas, serán os profesionais do sector os encargados de explicar o proceso de elaboración dos viños. Ademais, ofreceráselles unha degustación dos seus produtos.