Deteñen un veciño de Pontevedra por un delito de resistencia a axentes da autoridade, ameazas e lesións
Por Oskar Viéitez
Axentes do Corpo Nacional de Policía detiveron un home de 46 anos de idade, veciño de Pontevedra, con antecedentes policiais, como presunto autor dun delito de resistencia a axentes da autoridade, ameazas e lesións.
Segundo informan fontes oficiais da Comisaría Provincial de Pontevedra, os feitos tiveron lugar na tarde deste mércores, sobre as 15.07 horas, cando se recibiu unha chamada alertando dunha forte discusión no interior dunha vivenda, sita na rúa Estación.
Os axentes desprazáronse ao devandito lugar e entrevistáronse coa vítima que presentaba o seu rostro ensanguentado, diversas contusións e a súa roupa resgada. Este home manifestoulles ter sido ameazado de morte e agredido polo seu compañeiro de piso, no transcurso dunha discusión.
Os axentes procederon á identificación do presunto agresor o cal de forma despectiva, proferindo insultos e ameazas de morte contra os axentes se negou aos seus requirimentos, polo que foi detido, tramitándose o preceptivo atestado policial que unha vez finalizado foi remitido ao Xulgado de Instrución en funcións de Garda.
A vítima tras ser asistida por unha dotación do 061 foi derivada ao Hospital Montecelo onde foi atendido por sufrir politraumatismos.