Dende O Grove ata a montaña submarina do Banco de Galicia
Por Redacción
Despois de recuperar a súa saúde no Acuario do Grove a tartaruga mariña Rostro leva un mes de viaxe nas augas abertas. Neste tempo percorreu 600 km, unha media de case 9 quilómetros ao día, chegando a áreas mariñas oceánicas onde se superan os 4.000 metros de profundidade e mesmo aos arredores da montaña submarina do Banco de Galicia.
A tartaruga mariña Rostro foi localizada varada con graves feridas, en marzo de 2014 na praia do Mar do Rostro, en Fisterra, durante aqueles durísimos temporais do inverno.
Despois de moitos coidados por parte da xente da Coordinadora para el Estudio de Mamíferos Marinos (Cemma) no mes de xuño, con 40 centímetros de lonxitude e máis de catro quilos de peso, o exemplar foi embarcado no porto de Portosín, Porto do Son, para ser liberado a 20 millas fronte a Corrubedo.
Por primeira vez a CEMMA instalou un emisor satélite na cuncha da tartaruga co obxectivo de coñecer a capacidade de sobrevivencia e os seus movementos.