O Bar Pitillo, os Black Stones ou o Colexio de Avogados entre os premiados por Amigos de Pontevedra
Por Oskar Viéitez
Cumprindo coa súa esperada cita estival Amigos de Pontevedra designou as persoas e entidades que recibirán a homenaxe este ano, que como é habitual se celebrará a véspera da Peregrina.
Esta "xuntanza" vén sendo tradicional, dende hai corenta e catro anos, nas xornadas festivas do verán, premiando aquelas "persoas e entidades que dalgunha forma, por prestixio ou traballo, contribuíron ao engrandecemento da nosa cidade".
Segundo explican dende Amigos de Pontevedra, "con esta iniciativa pretendemos enxalzar e recoñecer o labor realizado por estas persoas e entidades a través de diferentes disciplinas como a educativa, deportiva, institucional ou social".
Así ao longo destes anos teñen sido galardoados médicos ilustres, profesionais competentes, deportistas, traballadores, novas promesas, industriais, emigrantes e persoas sinxelas que se destacaron polo seu amor á cidade.
No tradicional xantar do próximo día 8 de agosto realizarase a entrega destas distincións, que nesta edición serán para:
- Luís Campos Villarino, presidente do Colexio de Médicos de Pontevedra.
- Santiago Laya Fernández, presidente da Asociación de veciños "O Castro", de Mourente.
- José Luís Arellano Guiance, presidente do Gremio de Mareantes.
- O Colexio Provincial de Avogados de Pontevedra.
- Hifas da Terra, empresa de estudosos da micoloxía aplicada á alimentación, saúde e medio-ambiente.
- Bar Pitillo, típica taberna pontevedresa
- Os Black Stones, grupo musical precurores da movida pontevedresa dos anos 70
As tarxetas para asistir á comida homenaxe poderanse recoller, antes do día 6 de agosto, en: Almacenes Clarita, Cafetaría Center Soportales, Cafetaría Blanco y Negro e Hotel Comercio.