O xoves 16 inaugurase a Feira de Artesanía 'Chalana' por onde se agarda que pasen 100.000 visitantes
Por Redacción
O xoves 16 ás 12.30 horas inaugúrase a Feira de Artesanía 'A Chalana' no Paseo Odriozola, onde permanecerá ata o 4 de agosto. Nesta oitava edición serán quince expositores, o 80% galegos e a metade deles de Pontevedra.
A Feira contará con postos de venda de cerámica, xoguetes, ourivaría, esmaltes. Salvador Vázquez, representante da organización da Feira, indicou que esperan que en próximos anos se poida ampliar o número de postos de venda.
Nesta ocasión tamén se incorpora unha empresa que fai xabóns, unha artesá de Valencia que elabora roupa de algodón e outra de Asturias que ofrece diferentes produtos naturais e reciclados, segundo sinalou Salvador Vázquez, que comparecía coa concelleira de Feiras, Anabel Gulías, para presentar esta cita.
Pola edición do pasado ano pasaron máis de 100.00 persoas e a facturación media, segundo a organización, ascende a 6.000 euros por posto de venda.
Nesta ocasión, os horarios serán de 11.00 a 14.00 horas e de 19.00 a 23.00 horas coa posibilidade de ampliar esta franxa dependendo das actividades que se desenvolvan na praza da Ferrería.