Un home con discapacidade ratifica ante o xuíz un caso de abusos sexuais que os presuntos agresores negan
Por Natalia Puga
Manuel -nome figurado para respectar a súa intimidade- empezou un día a dicir insistentemente 'Ramón, Ramón, Ramón" na súa casa. Non tiña ningunha actitude máis que fixese que a súa nai e a súa coidadora sospeitasen que lle estaba a pasar algo, pero xusto despois a súa nai encontrou unha peza da súa roupa interior manchada de sangue. Preguntoulle que lle pasaba e el lle contou, segundo ela recorda: "Ramón tiroume ao chan e fíxome sangrar o cú".
O relato é duro e foi duro de escoitar para a súa nai, en especial polo alto grao de discapacidade que ten o seu fillo, que xa rolda os 50 anos, pero ten un atraso mental profundo que lle fai ter unha idade mental de entre tres e cinco anos.
Os feitos non están probados, son só a acusación que formula o fiscal, pero así os deu a coñecer este xoves na Audiencia Provincial de Pontevedra e así o acreditaron tanto a nai, coma a coidadora e o presunto agredido. No banco estaban sentados José Ramón S.C. como suposto autor dun delito de abuso sexual a unha persoa incapaz e Juan P.C. como suposto colaborador necesario pola súa complicidade co primeiro. Un teríao penetrado á forza por vía anal nunha construción da súa propiedade en Barro mentres o outro observaba a escena pola ventá.
Os dous acusados negaron este xoves os feitos ante o tribunal da Sección Segunda da Audiencia e os seus avogados pretenderon desacreditar tanto o relato do presunto agredido como o da súa nai, á que acusan de influír no seu fillo para que acusase en falso os dous procesados porque tiña contra un deles unha inimizade manifesta. Terían tido problemas previos, supostamente, por unhas acacias.
Mentres os dous procesados sosteñen a súa inocencia, o fiscal mantén que o relato de Manuel é "altamente creíble" e pide que por estes feitos José Ramón S.C. sexa condenado a seis anos de prisión e Juan P.C. a catro ou, alternativamente, a dous. Ao respecto, cabe destacar que os peritos acreditaron que este último procesado, que é primo da presunta vítima, ten un atraso mental moderado.
Os peritos relataron na sala que o atraso mental grave que padece Manuel provoca que "no es capaz de comprender lo que es una relación sexual, el lo vive como una lesión normal". Ademais, confirmaron que, tal e como sinalaba o fiscal na súa acusación, lle impide comprender a licitude ou a ilicitude de certos actos. Ao mesmo tempo, mantiveron que é unha persoa "doadamente modificable" e que se lle preguntaban directamente lles relataba o abuso sexual denunciado e mencionaba palabras tan inocentes como claras do estilo de "pilila" e "culo".
Segundo os peritos, non encontraron "nada significativo" na zona anal cando analizar ao presunto agredido, pero iso non significa que non se producise ningún incidente, senón que a súa exploración se realizou 15 días despois dos feitos relatados. Todo sucedeu en xuño do ano 2013.