Os pequenos acaparan a axenda municipal sanxenxina
Por Redacción
O alcalde de Sanxenxo, Gonzalo Pita, e máis o concelleiro de Deportes, Jesús Sueiro, recibiron este luns ao equipo infantil do Portonovo C.D., tras resultar campións da Liga 2014-2015, así como campións da Copa Deputación.
Á recepción, que tivo lugar no salón de plenos, acudiu unha representación dos pais dos xogadores, así como o presidente do Portonovo e o adestrador, así como a plantilla, agás un xogador.
Gonzalo Pita, que hai varios anos fora adestrador deste equipo de rapaces nunha temporada na que tamén conseguirán uns excelentes resultados deportivos, animounos a darlle continuidade a esta liña de deportividade.
Nunha linguaxe coloquial e moi familiar, o alcalde recordou ao rapaces a importancia da práctica deportiva como un elemento clave na súa formación, pero sempre sen descoidar os seus estudios.
O alcalde entregoulles un pergamiño manuscrito, a modo de agasallo, xunto co trofeo “Sanxenxo co Deporte”, como recoñecemento á súa traxectoria e aos bos resultados desta temporada.
Tanto o alcalde como o concelleiro de Deportes teñen previsto realizar nos vindeiros días outras recepcións similares a aqueles equipo ou clubs deportivos, de categorías inferiores, como recoñecemento oficial ao bo traballo realizado ao longo do ano.
SEGURIDADE VIAL NO PAIFILLONAI
Ademais, os cativos participantes no Paifillonai participaron onte nunha xornada de educación vial organizada pola Policía Local. Ata as instalacións do colexio de Portonovo desprazouse o Poli Paco, que en primeiro lugar ofreceu unha charla teórica aos rapaces. Posteriormente os nenos participaron nun circuito de karts e bicicletas, posto en marcha coa colaboración da DGT, para que puideran poñer en práctica os conceptos adquiridos na clase teórica.
O mércores a Policía Local organizará unha xornada de educación vial aberta a tódolos rapaces que queiran participar e que se desenvolverá no Parque do Espiñeiro.