Meis regresa ao século XIX cunha nova edición da súa tradicional Feira Labrega
Por Redacción
Un ano máis, o Campo da Feira de Mosteiro (Meis) volveu converterse durante a primeira fin de semana de xullo nun escenario propio do século XIX. Centos de persoas participaron este domingo, combatendo como puideron a calor reinante durante toda a xornada, na recreación da feira agraria que, naquela época, era unha das de maior importancia de toda Galicia no sector gandeiro.
Esta festa, organizada pola asociación cultural Cabemeis, fixo as delicias do público coa súa fiel recreación das actividades propias daquel entón, cunha exposición simbólica de animais (cabalos, burros, ovellas, vacas e outros), que atraeu a atención especialmente dos máis pequenos.
Ademais, tamén houbo unha mostra dos produtos gastronómicos da zona que habitualmente se consumían nesta época os días de feira (calos, carne en caldeirada, churros) así como da artesanía típica daqueles tempos que conformaban cesteiros, zapateiros, latoeiros, palilleiras e demais.
Todo iso ocupou o lugar orixinal onde se celebraba a antiga feira do gando, aínda que debidamente acondicionado para acoller todas as actividades programas.
E é que ademais dos postos de artesanía ou as degustacións gastronómicas, esta Feira Labrega contou con xogos para os máis pequenos, actuacións folclóricas, concertos das bandas de música do municipio e mesmo unha mostra ecuestre con cabalos de raza galega, todo iso envolvido sempre dentro dun ambiente teatral e propio da época.