Catro persoas feridas nun violento choque frontal entre dous turismos en Marcón
Por Redacción
A tradicional subida automobilística Cidade de Pontevedra tivo este ano un inicio accidentado. Non foi por mor dos participantes, que gardaron as debidas medidas de seguridade, senón entre os espectadores. Catro persoas resultaron feridas de diversa consideración tras colidir de forma frontal os dous turismos nos que viaxaban.
Foi na parroquia de San Miguel de Marcón, moi preto de onde se está a celebrar esta proba deportiva durante toda a fin de semana.
O accidente produciuse ao fío das dúas e media da tarde. Foi un particular o que deu o aviso ao 112 Galicia, que requiriu a presenza dos Bombeiros da cidade, que tiveron que liberar unha das persoas dada a dificultade para poder abrir a porta dun dos turismos sinistrados.
Ademais, ao lugar do accidente tamén se desprazaron Urxencias Médicas, Policía Local, Garda Civil de Tráfico e Protección Civil de Pontevedra.
Dous dos feridos foron trasladados en ambulancia ao Hospital Domínguez, mentres que os outros dous foron evacuados ao Hospital Montecelo.