Bueu volve apostar polo mercado ecolóxico coa sexta edición de Ecobueu
Por Redacción
Bueu acollerá o próximo domingo 12 de xullo a sexta edición de Ecobueu, un mercado ecolóxico que encherá de novo a praza Massó de ocio, gastronomía, teatro, obradoiros e música. Así se anunciou na presentación da súa programación.
Cunha concepción de potenciar os produtos próximos e agroecolóxicos, o mercado abrirá as súas portas o 11.00 a 20.30 horas. Haberá un máximo de sesenta expositores, dos que se reservan dez para Bueu. Desde o departamento de desenvolvemento local destacan que se presentaron máis de sesenta, pero "quedaremos coa cifra pactada para que os visitantes se poidan desprazar con tranquilidade".
Ademais dos expositores, o domingo haberá unha serie de actividades e obradoiros complementarios "aptos para todas as idades, polo que as familias poden vir xuntas e aprender un montón", resaltou a concelleira de Economía, Silvia Carballo.
Ás 12 horas Argo Navis impartirá un obradoiro de acuarelas sorpresa, ás 12.30 será a quenda dunha degustación de produtos vexetais ecolóxicos galegos, dando paso a outro de cestería con material reciclable. Ás dúas os asistentes poderán gozar dun ecoxantar na carpa, e xa ás 18 horas comezarán os obradoiros de encaixe de "horquilla", de candeas de cera natural, e de elaboración de xaleas con flores. Ás 19.30, Pinga Teatro terá unha sesión de contacontos, e pecharase cun desfile de moda e un show drinking de xenebras galegas.
E para os que desexen asistir a unha xornada temática sobre a innovación e o emprendemento en actividades tradicionais da terra e do mar haberá actividades no salón de plenos do Concello dende as 11 ata as 13.50.
Estes mercados constitúen unha das liñas básicas de actuación do goberno municipal para potenciar o comercio local e implementar a "marca Bueu" e para axudar a todos os veciños que buscan unha iniciativa de negocio, segundo destacou o alcalde Félix Juncal, que sinalou que supoñen tamén unha alternativa de emprego, "algo que imos conseguindo, pois xa temos constancia de que na vila están producindo leite, ademais de que xa nos preguntaron por unha explotación para a cría de porco celta".