Verducido celebra este domingo a Festa do Canteiro
Por Redacción
A área recreativa de Pontillón do Castro volverá a ser o escenario este domingo, 5 de xullo, dunha nova edición da Festa do Canteiro de Verducido. Un evento que logo de 15 anos segue a reivindicar a longa tradición de canteiros existente en Verducido e nas terras de Xeve.
Os membros da comisión organizadora da Asociación Cultural Festa do Canteiro, presidida por Blas Vázquez, que leva a cabo a festa coa colaboración da Comunidade de Montes de Verducido, presentaron na Deputación o programa da celebración.
A música, a gastronomia e a animación infantil servirán de complemento á festa que dará comezo ás 11 horas cunha degustación de polbo. Ás dúas da tarde terá lugar a gran churrascada a prezos populares e xa pola tarde a música animará o festexo coa actuación do Dúo Marema. Tamén haberá festa para os máis cativos dende as 17.00 horas con inchables, toro mecánico e unha festa da escuma.
TERRA DE CANTEIROS
Terra de canteiros, así é coñecida Verducido e as parroquias de Xeve, de onde xurdiron labregos da pedra durante os últimos séculos e que transmitían este duro oficio de pais a fillos.
Os canteiros de Xeve foron responsables de obras como a Escola Naval Militar de Marín; os Paradores de Turismo de Pontevedra, Cambados, Tui e Baiona; a reconstrución da ponte do Burgo; o Mercado de Pontevedra ou Hospital Xeral de Vigo.