Arde o interior dunha casa abandonada en Marcón
Por Redacción
As chamas apareceron este xoves no medio da noite na rúa Pedra do Lagarto. Procedían dunha casa que leva décadas abandonada, pero na que, segundo os veciños da zona, adoitan durmir persoas sen fogar. Os veciños puxéronse en contacto co Centro de Atención de Emerxencias de Galicia 112 e estes co Corpo de Bombeiros de Pontevedra, desembocando nunha intervención que, afortunadamente, permitiu sufocar as chamas sen lamentar danos maiores.
Segundo informaron os Bombeiros de Pontevedra, o aviso produciuse poucos minutos antes das 22.30 horas e, cando chegaron ao lugar, xa pertencente á parroquia de Marcón, puideron comprobar que se iniciara un incendio nun dos cuartos da casa, na que había gran cantidade de entullos. Grazas á intervención dos efectivos municipais de extinción de incendios, o incendio non foi a máis e tan só afectou a ese cuarto da casa.
Á chegada dos bombeiros non había ninguén no interior da vivenda, pero dende o Corpo si indican que teñen constancia da presenza de indixentes de forma frecuente no inmoble.
Ata o lugar tamén se desprazou a Policía Local de Pontevedra e a intervención causou gran expectación entre os veciños e condutores que circulaban pola zona, pois a presenza dos vehículos de emerxencia dificultaban a circulación. Curiosamente, tamén impediron circular a un rebaño de ovellas que pasaba pola zona a esas horas da noite.