A Infanta Elena inaugura en Sanxenxo o curso do Centro Nacional de Vela Adaptada entre berros de "guapa! "
Por Diego Espiño
"Elena, guapa!", berrou un pequeno grupo de mulleres que paseaba polo Porto Deportivo Juan Carlos I cando se encontrou, de súpeto, coa Infanta Elena, que acudiu este luns a Sanxenxo para apoiar o inicio do curso no Centro Nacional de Vela Adaptada, do cal é madriña a través da Fundación Mapfre.
Tamén a esperaban na entrada do Real Club Náutico varios membros da plataforma SOS Panadeira, que se achegaron a saudar a irmá do Rei aproveitando a ocasión para menosprezar o presidente do club, Pedro Campos, debido ao conflito aberto que mantén co colectivo.
Foron as dúas únicas anécdotas fóra do programa da representante da Casa Real, que polo demais se mostrou moi próxima cos usuarios das asociacións de persoas con discapacidade presentes no acto, dialogando con eles, retratándose xuntos ou mesmo exercendo de fotógrafa.
Previamente Dona Elena de Borbón asistiu a un encontro con empresas das Rías Baixas no que se presentaba aos profesionais o programa 'Juntos Somos Capaces', que dende hai cinco anos facilitou a formación e integración laboral de 1.600 persoas con algún tipo discapacidade ou problemas de saúde mental.
A guinda á xornada púxoa a saída en barco para comprobar de primeira man o progreso dos alumnos do Centro Nacional de Vela Adaptada, que dende que se instalou en Sanxenxo en 2012 deu servizo a un total de 800 persoas.
Nesta ocasión espérase que participen nos cursos do centro, dende maio ata setembro, 200 persoas con mobilidade reducida, dentro dunha iniciativa que naceu co obxectivo de achegar o deporte da vela a persoas con discapacidade axudándolles na súa integración na sociedade.
Relacionadas:
-
A Infanta Elena inaugura este luns un curso de verán do Centro Nacional de Vela Adaptada en Sanxenxo
Por Redacción |
-
O Porto Deportivo logra a total accesibilidade das súas instalacións ás persoas discapacitadas
Por Redacción |
-
A Infanta Elena amadriña o Centro Nacional de Vela Adaptada de Sanxenxo
Por Diego Espiño |