O aire africano seguirá ata o mércores con posibilidade de chuvascos treboentos durante a noite deste luns
Por Redacción
A fin de semana foi de sol e praia con temperaturas que superaron os 30 graos centígrados nas Rías Baixas e esta situación repetirase durante o luns e o martes desta semana debido á entrada de aire cálido africano. Non obstante, o servizo de MeteoGalicia apunta a posibilidade de que durante a tarde ou a noite do luns 8 se presenten chuvascos tormentosos na zona sur da provincia de Pontevedra. Os ventos soprarán do nordés.
A partir do martes comezará a retirarse de xeito moi lento a masa de aire cálido destas xornadas e as temperaturas baixarán lixeiramente. Os ceos permanecerán pouco anubrados ou despexados en xeral.
A xornada do mércores vén aparellada coa influencia anticiclónica pero a presenza de aire máis frío nas capas altas da atmosfera xerará certa inestabilidade e provocará o descenso das temperaturas nas Rías Baixas situándose entorno aos 24 graos.
Os ventos continuarán soprando do norte durante toda a semana, deixando ceos pouco anubrados ou despexados ata a chegada do sábado.