Deteñen un home tras levarlle os cartos a un mendigo na rúa García Camba
Por Redacción
Un home foi identificado por axentes da Policía Local durante o pasado luns 1 como presunto autor dun furto de moedas a un cidadán de orixe romanesa que pedía esmola nas inmediacións dunha pastelaría situada na rúa García Camba.
Uns turistas, segundo informou a Policía Local de Pontevedra, alertaron a media mañá os axentes tras comprobar como o home de 52 anos se levaba o diñeiro a un mendigo. Os membros da policía mantiveron un encontro co indixente, un home de avanzada idade que habitualmente pide esmola nesa zona, que manifestou que o ladrón lle retorceu o brazo para conseguir o botín.
Os axentes da Policía local lograron deter o presunto agresor que, segundo fontes policiais, resultou ser mudo, e achárono en posesión de diferentes moedas que sumaban pouca cantidade económica.