Buscan un home de 52 anos desaparecido en Tenorio hai tres días
Por Redacción
A Garda Civil estableceu un amplo dispositivo de busca para dar co paradoiro de Amador de la Iglesia Filgueira, un home de 52 anos que desapareceu en Tenorio (Cotobade) o pasado domingo 31 de maio.
Segundo a información facilitada por este corpo policial, o desaparecido mide 1,60 metros e ten o pelo negro e rizado, aínda que con algunhas canas.
Dende hai unhas horas, as tarefas de busca céntranse nas zonas de Tenorio, Parada e o ámbito do monte de Atalaya.
Participan axentes do Grupo Especial de Actividades Subacuáticas, o Seprona e varias patrullas da comandancia da Garda Civil de Pontevedra. En concreto, están a rastrexar a zona máis próxima ao río.
Segundo transcendeu, o home é veciño de Vigo. A Garda Civil xa se puxo en contacto coa súa familia quen, antes de recibir esta información, non presentaran denuncia sobre a súa desaparición.
Se calquera persoa ten algún tipo de información sobre o seu paradoiro, a Garda Civil pide que chamen ao teléfono 062.