Plantan menta poleo, sabugueiros e manzanillas no Rego Louriñas, en Salcedo
Por Redacción
O alumnado do Centro de Formación e Experimentación de Lourizán inspeccionaron o leito do Rego Louriñas para a súa conservación e mellora. Os traballos realizáronse nun treito de 500 metros que se inicia na fonte do lugar da Torre, cara ao muíño da zona.
O Rego Louriñas nace na parroquia de Salcedo e desemboca na de Lourizán, formando unha xunqueira-humidal situada entre o Poboado de Celulosas (Pontemuiños) e as cocheiras.
O rego é, con frecuencia, vítima de vertidos sólidos e líquidos e este ano os alumnos atoparon restos de ventás de aluminio, lixiviados de augas pluviais sobrantes así como filtracións procedentes das leiras veciñas.
O rego e a xunqueira son os dous riles que depuran e desaugan o exceso de choivas que doutro xeito darían lugar a posibles inundacións na contorna.
O alumnado do primeiro curso da titulación de técnico en Aproveitamento e Conservación do Medio Natural, en colaboración co Proxecto Ríos e seguindo o protocolo marcado pola inspección de ríos, analizaron as augas dende o punto de vista da calidade fisioquímica, da calidade biolóxica e da biodiversidade.
Ademais fixeron un importante labor de eliminación de especies invasoras e prantouse menta poleo, saúcos e manzanillas.
Á vista dos resultados obtidos, estes mozos salientaron "a elevada biodiversidade atopada a pesar da aparente pouca importancia e atención que está a recibir". Por iso é especialmente necesario insistir en que un ecosistema tan importante como son os nosos ríos precisa da colaboración e axuda de todos para a súa conservación e mellora.