O cámping de Ons abrirá a mediados de xullo e será de pagamento
Por Redacción
A conselleira de Medio Ambiente, Territorio e Infraestruturas, Ethel Vázquez, anunciou que a nova zona de acampada da illa de Ons abrirá a segunda quincena do mes de xullo e será de pagamento.
A concesionaria é a empresa Iniciativas Turísticas Ons, do grupo empresarial Acuña, que ofreceu un prezo de pasar a noite de 6 euros por campista.
A zona de acampada ocupa ao redor de 8.000 metros cadrados e terá capacidade para 276 campistas.
As obras do cámping, de segunda categoría, están en marcha dende hai semanas para rematar "canto antes" unhas instalacións construídas en madeira nas que primarán "a sostibilidade e a utilización de enerxías limpas", mediante a utilización de distintos elementos como paneis fotovoltaicos para xerar enerxía eléctrica, que serán complementados con paneis solares para a auga quente e un pequeno xerador por se xorde algún problema.
A día de hoxe os traballos céntranse no lugar de Chan da Pólvora onde irán situadas a recepción e cafetaría, a cabana do garda e os aseos.
Ademais xa se trasladou ata o lugar a depuradora que se encargará de tratar todas as augas residuais do complexo.
O proxecto contempla a instalación dun depósito de "augas grises", que permitirá reutilizar a auga das duchas e lavabos para as cisternas, tamén inclúese un depósito de 270 metros cúbicos de capacidade e unha potabilizadora de auga.