41 especialistas empezan as súas prácticas na área sanitaria
Por Redacción
A Xerencia de Xestión Integrada de Pontevedra e O Salnés deu a benvida este martes a 41 novos especialistas que completarán a súa formación nos hospitais e centros de saúde da área sanitaria. A súa chegada coincide coa despedida dos 35 residentes que acabaron a súa formación.
Os 41 novos residentes son 27 mulleres e 14 homes que realizarán un período de residencia de entre dous e cinco anos, dependendo da especialidade, en hospitais e centros de saúde de Pontevedra e O Salnés. 14 especializaranse en medicina familiar, 19 farano como especialistas hospitalarios, 2 en enfermaría obstétrico-xinecolóxica (matronas) e 6 en enfermaría familiar.
Todos eles foron os protagonistas dun acto no Hospital Montecelo presidido polo xerente, José Manuel González, que resaltou que este acto é reflexo da vocación docente que sempre acompañou a traxectoria dos centros sanitarios e que máis que unha despedida e unha benvida formal e protocolaria é a culminación do ano académico e, "sen ningunha dúbida, o momento máis importante no calendario dun Complexo Hospitalario que leva con orgullo a súa denominación de hospital universitario".
A Xerencia de Xestión Integrada de Pontevedra e Salnés conta con acreditacións docentes para formar matronas, enfermeiras de familia, especialistas en medicina familiar e en 20 especialidades hospitalarias: análises clínicas, anestesioloxía e reanimación, cirurxía xeral, cirurxía vascular, dermatoloxía, dixestivo, farmacia hospitalaria, hematoloxía, medicina interna, microbioloxía, obstetricia e xinecoloxía, oftalmoloxía, oncoloxía médica, otorrinolaringoloxía, pediatría, psicoloxía clínica, psiquiatría, radiodiagnóstico, rehabilitación e traumatoloxía.
Actualmente, nos hospitais e centros de saúde de Pontevedra e Salnés estanse formando un total de 123 residentes, 38 en medicina familiar, 75 nas diversas especialidades hospitalarias, 4 matronas e 6 enfermeiras de Familia.
O acto incluíu unha conferencia maxistral sobre "Obesidade no século XXI. Causas e consecuencias", a cargo do doutor Felipe Casanueva Freijo, catedrático de Medicina na Universidade de Santiago de Compostela e xefe de servizo de Endocrinoloxía do Complexo Hospitalario Universitario de Santiago.