A Garda Civil detivo por trapicheo no Vao a dous homes de 62 e 46 anos
Por Redacción
A Garda Civil detivo a F.G.P., de 62 anos de idade e veciño de Pontevedra e a J.F.R., de 46 con domicilio en Pazos de Borbén, como supostos autores dun delito contra a saúde pública, tráfico de drogas.
Segundo informaron fontes oficiais do Instituto Armado, na tarde do pasado día 22, unha patrulla do Posto da Garda Civil de Pontevedra procedeu ao control do vehículo marca Peugeot, modelo 307, cando circulaba pola estrada PO-531, nas inmediacións rotonda do Vao.
Unha vez identificados procedeuse a realizar un rexistro superficial do vehículo e dos seus dous ocupantes, localizándose no interior do pantalón de J.F.R., cinco envoltorios plásticos que contiñan 236 gramos de heroína.
Por todo iso, procedeuse á detención de ambos os dous como supostos autores dun delito de tráfico de drogas, sendo conducidos ás dependencias oficiais do referido Posto da Garda Civil para a instrución das correspondentes dilixencias.
No transcurso da instrución leváronse a cabo dous rexistros domiciliarios onde se incautaron básculas de precisión, substancias para o corte da droga e diversos útiles para a venda da heroína, ademais de 7.000 euros e diversas xoias, supostamente procedentes do pagamento da droga.
Os detidos, que contan con antecedentes policiais serán postos a disposición do Xulgado de Instrución número un de Pontevedra.