Dous feridos ao caer un coche dende un viaduto á vía rápida en Poio
Por Redacción
Dúas persoas resultaron feridas este mércores nun espectacular accidente rexistrado en Poio. Por motivos que se descoñecen, un turismo Audi A3 negro saiuse da vía e caíu dende a estrada pola que circulaba por un viaducto ata ir a parar á vía rápida Poio-Campañó.
Segundo informou o Centro de Atención de Emerxencias de Galicia 112, varios particulares chamaron por teléfono aos servizos de emerxencia sobre as 12.45 horas alertando de que un turismo se precipitara viaducto abaixo. O coche voou uns 20 metros, segundo testemuñas presenciais.
No interior do coche viaxaban dúas persoas que foron atendidas por unha UVI móbil enviada ao lugar do accidente por Urxencias Médicas de Galicia. Posteriormente, foron trasladadas ao Hospital Domínguez de Pontevedra.
Segundo explicaron as testemuñas do sinistro, as persoas saíron polo seu propio pé, de modo que non foi necesaria a intervención dun equipo de excarceración.
Como consecuencia do impacto, producíronse algúns danos como, por exemplo, a rotura do valo de protección da EP-0017. Ademais dos servizos sanitarios de urxencia e os axentes da Garda Civil de Tráfico, trasladouse ao lugar persoal de limpeza e mantemento da Consellería do Medio Ambiente, Territorio e Infraestructuras para restablecer a seguridade na vía.