Portos de Galicia cede a caseta de Chirleu en Aguete ao Concello de Marín para fins culturais
Por Redacción
O Concello de Marín acordou con Portos de Galicia establecer un convenio de colaboración para que o inmoble situado no porto de Aguete coñecido como a caseta de Chirleu sexa cedido ao municipio para que, á súa vez, o destine á asociación de pescadores.
Durante cinco anos, esta instalación terá que servir como espazo para actividades educativas, formativas e culturais.
A cesión non leva ligada a propiedade do espazo, que non se desafecta senón que permanece adscrito ao porto. O obxectivo é que un colectivo sen ánimo de lucro organice actividades sen que lle leve consigo un custo excesivo á asociación de pescadores de Chirleu, segundo informan dende o Concello de Marín.
Esta instalación foi inaugurada en agosto de 2013 e dende entón realízanse alí cursos para menores e tamén para adultos sobre as diferentes artes de pesca. Este caseta conta con 70 metros cadrados de superficie e foi elaborado en metal, con revestimento de granito e cristal.