Unha xanela radiofónica une Pontevedra e Aveiro
Por Redacción
O proxecto U-Web Radio, que a Universidade de Aveiro desenvolve co alumnado da Facultade de Ciencias Sociais de Pontevedra, busca estudar como unha radio online pode contribuír ao fomento dunha "conciencia multicultural" nas comunidades lusófonas.
No espazo radiofónico A Xanela os estudantes achegan esta iniciativa radiofónica á musica galega e á vida e obra do homenaxeado no Día das Letras Galegas neste 2015, o polígrafo pontevedrés Xosé Filgueira Valverde.
Impulsado pola Universidade de Aveiro, este proxecto interuniversitario tamén trata de estudar o “potencial que ten o uso de dispositivos móbiles” na transmisión de contidos radiofónicos a través da rede.
Para iso, desde a universidade lusa púxose en marcha a radio Decawebex, desde onde, nas tardes dos mércores, emite un programa semanal no que se inclúe o espazo deseñado e presentado polos estudantes do campus. Un programa que se pode escoitar tanto na propia emisora universitaria como en Internet, onde ademais vanse colgando tamén os diferentes programas para que queden a disposición de todos.