Denuncia que lle roubaran o móbil e a Policía o detén porque o vendera para comprar un novo
Por Redacción
A Policía Nacional detivo un mozo veciño de Pontevedra como presunto autor dun delito de simulación de infracción penal por inventarse que lle roubaran o móbil cando, en realidade, o vendera el mesmo para comprar outro.
Segundo informou a Policía Nacional, os feitos remóntanse ao 27 de marzo. O mozo, de 21 anos e con antecedentes policiais, denunciou na Comisaría nestas dependencias ter sido vítima dun roubo con intimidación o día anterior sobre as 22.30 horas.
Nesa primeira denuncia, o home contou que paseaba co seu can polos Xardíns de Vicenti e foi abordado por un individuo en bicicleta que lle arrebatou a faldriqueira que levaba colgada do brazo. No interior levaba un teléfono móbil e unha carteira con documentación persoal e 20 euros.
Os investigadores citárono novamente na Comisaría para seguir avanzando na localización do ladrón do móbil e, cando estaban a tomarlle declaración, o mozo recoñeceu ter presentado unha denuncia falsa. Ninguén lle roubara o iPhone, senón que llo vendera a outra persoa por 200 euros coa intención de comprar un novo.