Cinco traballadores de seguridade denuncian impago no Centro de Menores Avelino Montero
Por Redacción
O sindicato UGT denuncia que a cinco traballadores da empresa de seguridade, Compañía de Protección e Vixilancia Galaica, do Centro de Menores Avelino Montero se lles debe o salario dun mes, como "castigo" por reivindicar os seus dereitos laborais. David Piñeiro, delegado de persoal dos traballadores de vixilancia do centro de internamento e o secretario xeral de UGT, Ramón Vidal, insisten en que a empresa adxudicataria comete numerosas irregularidades como o non pagamento de salarios en data, non recoñece a representación dos traballadores ou non entrega os cuadrantes anuais do servizo.
Ante esta situación, o próximo xoves 21, os representantes sindicais reuniranse co xefe territorial de Traballo, María Peón, para que dende a Xunta de Galicia se obrigue a empresa a cumprir o establecido no convenio laboral.
David Piñeiro indicou que o resto do persoal, 20 empregados, cobra con atraso. E ademais alertan de que esta situación laboral pode rematar repercutindo no funcionamento diario do Centro de Menores, debido ás malas condicións de traballo e tamén á falta do material adecuado para poder exercer o servizo. "Téñennos amedrentados", indica o representante de persoal do centro, que na mañá deste luns en compañía de representantes sindicais levou a cabo unha concentración ante as portas do centro.
Na actualidade, o centro conta con 22 mozos internos que chegan a 25 durante o fin de semana. "O centro está a tope de capacidade", afirma Ramón Vidal, que reclamase o xefe provincial de Traballo que suspenda a actual adxudicación, cuxa vixencia finaliza a finais deste ano coa posibilidade de prórroga por dous anos máis.
Relacionadas:
-
Protesta dos traballadores de seguridade do Avelino Montero ao persistir os impagamentos dos seus salarios
Por Diego Espiño |
-
O persoal de seguridade do Avelino Montero denuncia os incumprimentos laborais da empresa
Por Anxo Lourido |
-
'El Peque' que revolucionou o Avelino Montero enfróntase a 25 anos máis de cárcere
Por Oskar Viéitez |