Detida por intromisión na morada por entrar nunha casa de Marcón alegando que quería alugala
Por Redacción
Unha familia de Valadares, en Marcón, levouse un bo susto o mércores 13 de maio. Unha muller entrou na súa casa sen permiso e percorreu varias das estanzas ata que foi sorprendida pola propietaria e intentou saír fuxindo. Finalmente, o dono deulle alcance e retívoa ata que chegou a Policía.
Unha patrulla da Policía Nacional acudiu ao lugar e entrevistouse coa sospeitosa. A muller, que foi identificada como unha veciña de Pontevedra de 33 anos, explicou que entrara na casa porque buscaba unha casa para poder alugar.
A vivenda en cuestión non tiña ningún cartel de aluguer e a muller conta con múltiples antecedentes policiais. Os axentes atribúenlle un delito de intromisión na morada e procederon á súa detención.
Os propietarios da casa explicaron que todo aconteceu sobre as 19.55 horas. A sospeitosa entrou e percorreu varias estanzas, chegando a pasar por un cuarto no que hai unha muller encamada. O propietario da casa estaba no terreo recollendo verduras cando se decatou do que sucedía e logrou interceptar a presunta ladroa.
Os policías non lle atribúen un delito de roubo porque os propietarios non botan nada en falta do interior da vivenda.