O luns haberá restriccións de tráfico no enlace de Meis da Autovía do Salnés
Por Redacción
O ramal de entrada á Autovía do Salnés no enlace de Meis, en sentido Sanxenxo, estará restrinxido ao tráfico o vindeiro luns 11 de maio, a partir das 10:00 horas por mor duns traballos de roza dun noiro de desmonte.
Trátase dunha actuación de conservación ordinaria que se prolongará por un tempo aproximado de hora e media; polo que a normalidade ao tráfico quedará restablecida esa mesma mañá.
Para permitir a entrada á Autovía do Salnés, Medio Ambiente sinalizará un itinerario alternativo para os usuarios a través de estrada provincial EP-9405, de xeito que os vehículos se incorporarán polo enlace de Ribadumia (PK9), no lugar de facelo polo enlace de Meis (PK 7+500).
Debido ao tamaño da maquinaria necesaria para realizar os traballos, así como as características da zona na que se van a executar, os técnicos recomendan restrinxir a circulación neste punto durante a execución destas tarefas de conservación ordinaria. Os desvíos quedarán sinalizados nos paneis de mensaxería variable da autovía.