O luns inicianse as obras da rede de sumidoiros no Pereiro-O Pozo
Por Redacción
A Consellería de Medio Ambiente, Territorio e Infraestruturas inicia o vindeiro luns 11 as obras de rede de sumidoiros en Pereiro- O Pozo, no Concello de Marín. Augas de Galicia adxudicou este contrato de obra hidráulica por un importe de 522.000 euros, á empresa Sevitec Medioambiente, SL.
As obras consisten na instalacións de case un quilómetro (940 metros) de colectores por gravidade, e dous bombeos.
A actuación que se iniciará o luns é un dos proxectos para o saneamento en Pereiro-O Pozo, xa que se desdobra en dous proxectos, que suman un investimento dun millón de euros.
O segundo dos proxectos é o correspondente ao saneamento de Pereiro- Cadrelo, cun investimento de arredor de 540.000 euros, que está en fase de recepción de ofertas. Ambas actuacións están recollidas no convenio asinado en 2010 entre a Xunta e o Concello, polo que se desenvolven varias infraestruturas hidráulicas no rural e do cal xa se executaron actuacións por máis de 1,5 millóns de euros.