59.000 euros para asegurar as obras do Museo, valoradas en 156 millóns
Por Redacción
Os seis edificios do Museo de Pontevedra teñen obras de arte valoradas en 156 millóns de euros. Aseguralas non é doado e, sobre todo, non é económico. A Deputación Provincial ven de prorrogar o seguro por 59.000 euros anuais.
O presidente da Deputación Provincial, Rafael Louzán, anunciou este venres que a Xunta de Goberno prorrogou o contrato durante un ano coa compañía 'Nationale Suisse, Compañía de Seguros e Reaseguros'.
En total, no Museo hai 20.500 obras de arte. As do Sexto Edificio son as de maior valor, fixado en 65,1 millóns de euros. As do edificio de Castro Monteagudo, en 30; as de García Flórez, en 10; as de Fernández López, en 45; as do Sarmiento, en un millón; e as das Ruínas de San Domingos, en 4,8 millóns.
Louzán considera que esas datas significan que o Museo de Pontevedra é a "institución de referencia" en Galicia en canto a conservación, restauración e posta en valor da cultura galega, tanto polo seu número de doazóns como polo de depósitos que recibe.