O Concello e a patronal local acordan manter os convenios anuais
Por Redacción
As directivas de Aempe e AJE, as dúas asociacións empresariais con maior relevancia en Pontevedra, xuntáronse este mércores coa concelleira de Promoción Económica e Turismo, Carlota Román, para preparar os convenios de colaboración para este ano e para facer unha valoración do traballo conxunto nestes catro anos do mandato municipal.
Carlota Román agradeceu expresamente o esforzo do empresariado local e salientou que o ano pasado pecháronse 22 eventos de diferente formato "e fixémolo mentres moitos recintos feirais languidecían", afirmou a concelleira.
Tanto a responsable municipal como os empresarios coincidiron en que é necesario manter a colaboración para non desfacer o camiño que se ten avanzado.
Finalmente, acordaron manter os convenios anuais polos que o Concello financia actividades propias das asociacións. Aempe obterá 16.000 euros para organización de actividades de promoción comercial, mentres que AJE mantén a achega de 8.000 euros para actividades de formación e organización do premio aos novos empresarios.