A Asociación Juan XXIII convértese nunha referencia galega na atención á discapacidade intelectual
Por Oskar Viéitez
A Asociación Juan XXIII de Pontevedra convértese nunha referencia galega na atención á discapacidade intelectual tras recibir o certificado de acreditación Calidade FEAPS nos seus centros e servizos, no nivel de calidade, unha das catro etapas (Compromiso, Despregamento, Calidade e Excelencia) que contempla o modelo da Federación de Organizacións en favor de Persoas con Discapacidade Intelectual (FEAPS).
A asociación pontevedresa persegue os maiores niveis de excelencia en todos os seus centros dirixidos a persoas con discapacidade intelectual, polo que na actualidade desenvolve o modelo de calidade FEAPS, sendo a primeira entidade galega do sector en obter a certificación nesta etapa e a cuarta en todo o territorio español.
Está acreditación lógrase despois dun rigorosa avaliación na que se destacan como puntos fortes a gran satisfacción de todos os seus grupos de interese: persoas, familias, voluntarios e profesionais, así como un alto compromiso coa calidade e coa ética.
Ao redor de 225 persoas con discapacidade intelectual dos seus Centros de Día, Centros Ocupacionais, Vivenda Tutelada e Fundación para o emprego beneficiaranse do recoñecido modelo, baseado en calidade de vida, calidade na xestión e compromiso ético.
Esta asociación leva máis de 45 anos dedicada á formación e promoción das persoas con discapacidade intelectual coa misión de prestar apoios e servizos de calidade ante as súas necesidades e demandas para potenciar as súas capacidades e mellorar a súa calidade de vida persoal, social e familiar.
Para todo iso, esta organización utiliza a calidade como estratexia clave que guía a organización no seu conxunto. A Asociación Juan XXIII entende a calidade como un compromiso ético que ofrece máis garantías de tratos e actitudes de respecto e de dignidade da persoa.
Ademais deste certificado todos os seus centros cada ano xa son merecedores do Certificado de Calidade AENOR que garante o cumprimento da norma UNE-EN-ISO-9001:2008.