Detido por roubar cable eléctrico e deixar sen luz media rúa en Monte Porreiro
Por Natalia Puga
A Policía Local de Pontevedra detivo na noite do xoves 9 de abril a un home como presunto autor dun delito de roubo por levarse cable eléctrico de cobre da instalación de iluminación pública do barrio de Monte Porreiro. Cando foi localizado xa deixara sen luz media rúa.
Os feitos aconteceron sobre as 22.30 horas. A Policía Local tivo constancia de que unha persoa estaba a manipular unha tapa dun farol na rúa Dinamarca e, cando unha patrulla chegou ao lugar, localizou un varón preto do citado farol e que a tapa estaba aberta e os cables parcialmente roubados.
Ao lado apareceron uns alicates e un desaparafusador e os axentes comprobaron que a metade da rúa estaba sen luz e que había varios farois coa porta aberta e os cables cortados, de modo que procederon á detención da persoa que presuntamente os había manipuado.
Os axentes constataron danos en oito farois da rúa Dinamarca e unha da rúa Holanda. En total, o importe dos danos ocasionados e atribuídos ao detido alcanza os 2.144 euros.
Esta detención enmárcase dentro do operativo especial de vixilancia que mantiña aberto a Policía Local de Pontevedra ante os numerosos roubos que se rexistraron nos últimos tempos no cableado eléctrico da iluminación pública na cidade e especialmente no barrio de Monte Porreiro. Estas subtraccións de cable de cobre causan un grave dano aos veciños e ao patrimonio municipal.