Expropiados de Vilaboa para a mellora da N-554 denuncian que "seguen sen recibir un euro" dende 2006
Por Redacción
O proceso de expropiacións das terreos afectados pola mellora da seguridade vial na estrada N-554 en Vilaboa comezou no ano 2006. Nove anos despois, e coa obra xa rematada dende hai anos, os afectados denuncian novos atrasos no pagamento pola ocupación das súas propiedades.
Os afectados difundiron este fin de semana un comunicado no que denuncian un "enésimo atraso" no aboamento das cantidades que lles deben polas propiedades cuxas actas de levantamento previo se produciron entre 2006 e 2008 a pesar de que xa recibiron "reiteradas promesas de que se ían facer efectivos".
"Ata o momento seguen sen recibir un euro", indica o voceiro do colectivo, Ricardo Fernández. Segundo explica, a delegación do Ministerio de Fomento na Coruña leva varios meses informándoos de que o pagamento polos terreos afectados sería inminente, pero "os feitos demostran que levan esperando anos e que este non se acaba de materializar".
Ante esta situación, están a estudar celebrar unha asemblea para "iniciar un proceso de mobilizacións co fin de premer a Administración para que faga fronte ás súas obrigas".
As obras na N-554 polas que están afectados afectan ao tramo desta estrada estatal que vai dende o cruzamento coa N-550 ata a ponte de Rande e ocuparon preto de 400 propiedades.