Dous mil mozos da provincia participarán en 71 cursos do Plan Actívate
Por Redacción
Ata 57 concellos da provincia de Pontevedra impartirán 71 cursos de formación ó amparo do Plan Actívate 2015, un programa dirixido a mozos de 16 a 35 anos de idade que nesta ocasión oferta máis de 30 especialidades diferentes.
Segundo o acordo aprobado na xunta de goberno da Deputación Provincial, 2.000 mozos da provincia poderán completar a súa formación nestas máis de 30 especialidades que se van impartir.
Entre os municipios beneficiados atópanse seis da comarca de Pontevedra. Barro, Campo Lameiro, Cotobade, A Lama e Poio impartirán un curso de formación cada un deles, mentres que Vilaboa solicitou poder ofertar dúas destas actividades.
Dirixidos a mozos de entre 16 e 35 anos, os cursos teñen unha duración de 40 horas a impartir durante dous días á semana, e con eles preténdese ofrecerlle á mocidade actividades formativas de interese tanto para o seu desenvolvemento profesional coma social e persoal.