Celso, na familia socialista dende o ano 36
Por Redacción
En 1936, con 20 anos e en plena Guerra Civil, Celso García de la Riega afiliabase ao PSOE. En 2015, con 99 anos, converteuse no afiliado máis antigo de España. Este xoves ese mérito valeulle unha homenaxe, na que o secretario xeral do PSdeG, José Ramón Gómez Besteiro, destacou o seu compromiso e valentía.
Os 79 anos que leva formando parte do partido deixaron pegada na súa vida e testemuñas do moito que o marcou o sentimento socialista foron o seu fillo Guillermo e a súa sobriña Maica, que aseguraron que as constantes da súa historia vital foron "loita, lealdade e sufrimento".
Visiblemente emocionado, o seu fillo agradeceu que "non só é unha homenaxe a el, senón a todos aqueles que no 36 fixeron o esforzo de loitar contra o levantamento e a favor da República, a todos aqueles que quedaron polo camiño" mentres que Maica lembrou a Merchi, a súa muller e "a persoa máis importante da súa vida".
O sentimento socialista do militante número 1 do PSdeG marcou tamén a elección da data da súa voda, o 14 de abril, aniversario da II República, pero finalmente tivo que cambiala por imposición do pai da súa muller, que entón era presidente da Audiencia de Pontevedra e co que tivo unha relación complicada.
"En tempos moito peores el mantivo as súas ideas, e é un exemplo para seguir adiante"
Besteiro destacou os máis de 130 anos de historia do PSOE e asegurou que, de cara ás eleccións do 24 de maio, "nós non ocultamos as nosas siglas, fronte aos que parece que teñen medo a ensinalas. Nós ensinamos toda a forza que nos aporta o noso partido e persoas como Celso".
O secretario xeral provincial, Santos Héctor, amosou o seu "orgullo" por telo como compañeiro e quixo recoñecer "a súa loita na defensa da igualdade, a liberdade e a xustiza social, valores que leva acuñados ata hoxe e que fan valer a súa loita despois de tantos anos".