Principio do fin para as filtracións na praza da Panadeira
Por Redacción
As obras de impermeabilización e pavimentación da praza A Panadeira, situada na avenida de Madrid de Sanxenxo, comezaron este martes co obxectivo de emendar as filtracións que se rexistran neste espazo e un presuposto de 47.719,76 euros.
O concelleiro de Obras e Infraestruturas, Tino Sanmartín, confirmou o inicio dos traballos, que no seu primeiro día supuxeron a retirada do mobiliario urbano e a demolición e recollida tanto do pavimento coma de elementos alleos.
En días posteriores, os operarios procederán a subministrar o correspondente morteiro previo á dotación da nova capa dobre de impermeabilizante. As tarefas culminarán coa colocación de baldosa hidráulica de cemento rematado superficial en relevo antideslizante de 30 x 30 sobre soleira de formigón, ademais do zócolo e bordo en granito.
A obra está proxectada para realizarse nun prazo de tres meses, pero Tino Sanmartín avanzou que intentarán reducir os prazos ao máximo para que a actuación estea concluída en cuestión de semanas.