Rouba unha furgoneta, atropela o dono e foxe
Por Natalia Puga
Patrullas policiais e sereas causaron gran balbordo este luns por distintas rúas de Pontevedra, dende Conde Bugallal ata Iglesias Vilarelle. A orixe de todo o 'escándalo' foi o roubo dunha furgoneta de repartición, no que o ladrón, tras coller o vehículo, atropelou o seu propietario e fuxiu pola cidade. Acurralado polas policías Local e Nacional, deixou o vehículo abandonado e fuxiu a pé, pero pouco despois foi localizado e detido. Trátase dun home de 34 anos de orixe portuguesa.
Todo aconteceu a media tarde. Un home estaba a realizar unha repartición de mercadoría na rúa Conde Bugallal e, cando se ausentou para entregar unhas prantas, un individuo entrou no vehículo e rouboullo. En canto se decatou do que sucedía, o dono dirixiuse cara á furgoneta para intentar evitar que a levase, pero o ladrón non se detivo e pasoulle sobre o pé.
Segundo informou a Policía Local, o dono do vehículo resultou ferido e tivo que ser trasladado ao Hospital Montecelo. Mentres a el lle atendían, o escenario do roubo paseouse por toda a cidade, pois as policías Local e Nacional estableceron un dispositivo de busca para localizar o ladrón.
Nun momento dado, á altura da rúa Iglesias Vilarelle, abandonou a furgoneta e fuxiu a pé. A fuxida durou pouco tempo, pois axentes da Policía Nacional localizárono pouco despois e procederon á súa detención por un delito de furto e uso de vehículo e traslado a dependencias policiais. o vehículo foi recuperado e trasladado pola Policía Local á Comisaría Provincial e permanece estacionado na rúa Joaquín Costa á espera de ser analizado pola Policía Científica.
Fontes policiais indican que o home foi detido nos últimos días por feitos similares noutro punto da provincia.